ЕУ: Економијата расте, емисиите паѓаат

август 19, 2026

Во првиот квартал од 2026 година емисиите на стакленички гасови биле 1,2% пониски од истиот период лани, додека БДП на Европската Унија пораснал за 0,8%

Европската Унија во првиот квартал од 2026 година забележала намалување на емисиите на стакленички гасови на годишно ниво, истовремено со раст на економијата. Според најновите податоци на Eurostat, сезонски приспособените емисии биле 1,2% пониски во однос на Q1 2025, додека БДП на ЕУ се зголемил за 0,8%.

Вкупните емисии на економијата на ЕУ во Q1 2026 се проценети на 837 милиони тони CO₂-еквивалент.

Краткорочната, квартална слика, сепак, е различна. Во споредба со Q4 2025, емисиите се зголемиле за 0,3%, од 835 на 837 милиони тони CO₂-еквивалент, додека БДП на ЕУ останал непроменет.

Енергетскиот сектор со најголем квартален раст на емисиите

Најголемото квартално зголемување е регистрирано во секторот за снабдување со електрична енергија, гас, пареа и климатизација, каде што емисиите пораснале за 4,8%.

Раст од 0,7% е забележан кај водоснабдувањето, канализацијата и управувањето со отпад.

Во спротивна насока се движеле емисиите од домаќинствата, кои се намалиле за 1,3%, додека производството, градежништвото и транспортот и складирањето забележале пад од по 0,6%.

Според структурата на вкупните емисии во Q1 2026, најголем удел имало производството со 20,8%, по што следуваат домаќинствата со 20,2% и снабдувањето со електрична енергија, гас, пареа и климатизација со 16,5%.

Емисиите пораснале во 20 од 27 членки на ЕУ

Зад релативно малата промена од +0,3% на ниво на целата ЕУ се кријат значителни разлики меѓу земјите членки.

Во Q1 2026, во споредба со претходниот квартал, емисиите на стакленички гасови се зголемиле во 20 од 27 земји членки, а се намалиле во седум.

Најголем раст е забележан во Естонија, +9,7%, потоа во Финска, +6,4%, и Бугарија, +4,6%. Според Eurostat, растот во овие земји во голема мера произлегува од повисоките емисии од градежништвото и од секторот за снабдување со електрична енергија, гас, пареа и климатизација.

На другиот крај се Словенија со пад од 5,0%, Луксембург со 3,8% и Романија со 2,7%.

Податоците покажуваат дека движењето на емисиите и економската активност не било исто во сите земји. Од 20-те членки во кои емисиите се зголемиле, 18 истовремено забележале раст на БДП.

Од седумте земји што ги намалиле емисиите, четири имале повисок или стабилен БДП, и тоа Шпанија, Грција, Франција и Словенија.

Токму оваа разлика е значајна за толкувањето на европските податоци: на годишно ниво ЕУ истовремено бележи пад на емисиите од 1,2% и раст на БДП од 0,8%, но кварталните движења покажуваат дека декарбонизацијата не се одвива рамномерно ниту меѓу секторите, ниту меѓу земјите членки.

Податоците се сезонски приспособени квартални проценки на Eurostat за емисиите на стакленички гасови според економската активност. Тие ги опфаќаат CO₂, метан, азотен оксид и флуорирани гасови, изразени во CO₂-еквивалент.

ECI

Напишете коментар

Вашата адреса за е-пошта нема да биде објавена. Задолжителните полиња се означени со *