Тендерот ќе биде објавен во септември, а аукцијата е планирана за првиот квартал од 2027 година. Турција има цел да достигне 5.000 MW ветерни капацитети на море до 2035 година.
Турција ќе ја одржи својата прва аукција за ветерни електрани на море во првиот квартал од 2027 година, соопшти турското Министерство за енергетика и природни ресурси. Тендерот ќе биде официјално објавен во септември 2026 година и ќе се спроведува преку моделот за зони на обновливи извори на енергија – YEKA.
Министерот за енергетика и природни ресурси, Алпарслан Бајрактар, изјави дека ова ќе биде прва аукција од ваков вид во турскиот енергетски сектор. Турција има цел до 2035 година да достигне 5.000 MW инсталиран капацитет од ветерни електрани на море, а Бајрактар смета дека целта може да биде остварена и порано.
Идентификувани четири подрачја
Врз основа на досегашните истражувања, турските власти идентификувале четири подрачја со потенцијал за развој на ветерни електрани на море: Сароскиот Залив, Гокчеада, Бозџаада и морското подрачје крај Едремит.
Во тек се техничките и административните постапки овие локации формално да бидат прогласени за зони за ветерна енергија на море во рамките на моделот YEKA.
Министерството веќе го објави нацртот на тендерската документација. Претставниците на индустријата, инвеститорите и другите заинтересирани организации можат да достават мислења и предлози до 17 август, по што ќе биде подготвена конечната верзија на тендерските услови.
Придонес за енергетската сигурност и домашната индустрија
Според Бајрактар, Турција не ја разгледува ветерната енергија на море само како нов извор на електрична енергија. Таа треба да придонесе и за сигурноста на снабдувањето, развојот на домашната индустрија и отворањето квалификувани работни места.
Турција планира да ги претстави своите амбиции за ветерна енергија на море пред климатската конференција COP31, која во ноември ќе се одржи во Анталија. Бајрактар ги повика домашните и странските инвеститори да го следат тендерскиот процес и да учествуваат на првата аукција.
Турција за пет години го зголеми капацитетот од обновливи извори за 55%
Турција во изминатите пет години значително го зголеми производствениот капацитет од обновливи извори на енергија, пред сè преку брз развој на ветерните и фотонапонски електрани. На крајот на 2025 година вкупниот инсталиран капацитет од обновливи извори достигнал 76.300 MW, во споредба со 49.195 MW во 2020 година. Тоа претставува зголемување од 55% за само пет години.
Најголем придонес во растот имаат ветерните и сончевите електрани. Според податоците на Министерството за енергетика и природни ресурси на Турција, во земјата работат 408 ветерни електрани и 40.457 ФН електрани. Нивниот заеднички инсталиран капацитет, заклучно со 2 јуни 2026 година, достигнал 41.944 MW.
ECI

