Француската енергетска компанија подготвува адаптација на нуклеарните и хидроелектраните кон повисоки температури, суши, поплави и промени во достапноста на водата.
Француската државна енергетска компанија EDF планира во следните 15 години да инвестира 8,7 милијарди евра во зголемување на отпорноста на своите производни капацитети кон климатските промени. Програмата ќе ги опфати нуклеарните и хидроелектраните, како и капацитетите на компанијата во француските прекуморски територии.
Планот го претстави претседателот и извршен директор на EDF, Бернар Фонтана, при објавувањето на резултатите за првата половина од 2026 година. Според него, инвестициите треба да го намалат влијанието на топлотните бранови, сушите, поплавите, пожарите, бурите и променливата достапност на водните ресурси врз производството на електрична енергија.
Водата станува критичен фактор за нуклеарното производство
Особено внимание ќе биде насочено кон системите за ладење на нуклеарните електрани. Високите температури и ниските протоци на реките можат да го ограничат производството и кога реакторите се целосно технички исправни, бидејќи електраните мора да ги почитуваат еколошките ограничувања за температурата и количината на водата што се враќа во реките.
Во текот на топлотниот бран во Франција, EDF привремено запрел три реактори, додека производството било намалено кај уште девет. Компанијата разгледува дополнителни решенија за ладење на водата пред нејзиното враќање во животната средина, а климатските проекции веќе се земаат предвид и при проектирањето на новите реактори EPR2.
Покрај високите температури, електраните се соочуваат и со нови биолошки ризици. Во нуклеарната централа „Гравлин“ три реактори биле исклучени откако големо количество медуз ги блокирало системите за зафаќање вода. EDF поради тоа го засилува следењето на медузите и алгите и подготвува мерки за нивно рано откривање.
Нови услови и за хидроелектраните
Климатските промени истовремено го менуваат и работењето на хидроелектраните. Подолгите сушни периоди и намалените снежни врнежи ја ограничуваат достапноста на водата, додека екстремните врнежи и поплавите создаваат дополнителен притисок врз браните, преливните системи и управувањето со акумулациите.
EDF затоа планира модернизација на хидроенергетската инфраструктура, со цел да ја зголеми нејзината расположливост и да овозможи пофлексибилно управување со водата. Компанијата посебно предупредува дека историските хидролошки податоци повеќе не можат да бидат единствена основа за планирање на идното производство.
EDF во 2025 година веќе инвестирал 932 милиони евра во климатска адаптација. Од нив, 751 милион евра биле насочени кон приспособување на дистрибутивната мрежа управувана од Enedis, 88 милиони евра кон нуклеарните капацитети, а 21 милион евра кон хидроенергетските и другите системи.
Новата програма покажува дека климатската отпорност станува една од главните инвестициски категории во европската енергетика, заедно со изградбата на нови производни капацитети, мрежи и системи за складирање електрична енергија.
ECI

