Турција за пет години го зголеми капацитетот од обновливи извори за 55%

јуни 6, 2026

Турција забрзано ја проширува зелената енергетска база. Инсталираниот капацитет од обновливи извори достигна 76,3 GW на крајот на 2025 година, што е раст од 55% во однос на 2020 година.

Турција во изминатите пет години значително го зголеми производствениот капацитет од обновливи извори на енергија, пред сè преку брз развој на ветерните и фотонапонски електрани. Според податоците објавени од Hürriyet Daily News, вкупниот инсталиран капацитет од обновливи извори достигнал 76.300 MW на крајот на 2025 година, во споредба со 49.195 MW во 2020 година. Тоа претставува зголемување од 55% за само пет години.

Ветерот и сонцето стануваат носечки столбови

Најголем придонес во растот имаат ветерните и сончевите електрани. Според податоците на Министерството за енергетика и природни ресурси на Турција, во земјата работат 408 ветерни електрани и 40.457 ФН електрани. Нивниот заеднички инсталиран капацитет, заклучно со 2 јуни 2026 година, достигнал 41.944 MW.

Овој податок покажува дека Турција повеќе не го третира сонцето и ветерот како дополнителни извори, туку како централни елементи на електроенергетскиот систем. Со вакво темпо, обновливите извори стануваат важен инструмент за намалување на увозната зависност, зајакнување на енергетската сигурност и намалување на емисиите.

Ветерниот сектор прераснува во индустрија

Особено силен развој бележи ветерната енергија. Капацитетот на ветерните електрани, кој во 2005 година изнесувал само 20 MW, денес надминува 15.105 MW. Во 2025 година ветерните електрани обезбедиле 10,9% од вкупното производство на електрична енергија во Турција, кое изнесувало 393 милијарди kWh.

Но, значењето на ветерната енергија не е само во производството. Турција паралелно развива и домашна индустрија за опрема. Во земјата веќе се произведуваат кули, лопатки, генератори, запчаници и други компоненти за ветерни електрани, а дел од оваа опрема се извезува, особено на европските пазари.

Од монтажа на панели кон повисока додадена вредност

Сличен процес се случува и кај сончевата енергија. Турција со години има силна позиција во производството на соларни панели, но новите инвестиции ја поместуваат индустријата кон повисоки фази на технолошкиот синџир, вклучително и производство на соларни ќелии и вафери.

Ова е важна разлика во однос на многу земји од регионот. Турција не инвестира само во нови електрани, туку гради и индустриска основа околу обновливите извори. Тоа значи повеќе домашна вредност, поголем извозен потенцијал и помала зависност од увоз на енергетска технологија.

Редакција

Напишете коментар

Вашата адреса за е-пошта нема да биде објавена. Задолжителните полиња се означени со *