ЕУ воведува заедничко оценување на енергетската ефикасност на дата-центрите

септември 22, 2026

Европската комисија предложи заеднички систем за оценување на енергетската и водната ефикасност на дата-центрите во Европската Унија. Новата рамка треба да обезбеди поголема транспарентност за нивната потрошувачка на ресурси и поодржливо вклучување во европскиот енергетски систем.

Системот ќе ги опфати сите дата-центри со инсталирана ИТ-моќност над 500 kW. Нивната ефикасност ќе се оценува врз основа на потрошувачката на електрична енергија и вода, со што ќе се овозможи споредба меѓу различни објекти низ ЕУ.

Според Комисијата, добро проектираните и флексибилни дата-центри можат да ја приспособуваат потрошувачката на електрична енергија кон состојбата во мрежата. На тој начин тие можат да придонесат за пониски системски трошоци, поголема стабилност на мрежата и подобра интеграција на обновливите извори.

Разбирањето на потрошувачката на енергија и ресурси е првиот неопходен чекор кон одржлива интеграција на дата-центрите во нашиот енергетски систем. Дигиталниот суверенитет мора да оди рака под рака со енергетската одговорност.

Дан Јоргенсен, европски комесар за енергија и домување

Предложениот систем е утврден со делегирана регулатива. Европскиот парламент и Советот ќе имаат рок од два месеци да го разгледаат актот, а првите ознаки за одржливост на дата-центрите се очекуваат во 2027 година.

Потрошувачката може речиси да се удвои до 2030 година

Дата-центрите во ЕУ потрошиле околу 68 TWh електрична енергија во 2024 година. Поради брзиот развој на вештачката интелигенција и растечката потреба од компјутерски капацитети, нивната потрошувачка се очекува да достигне 114 TWh до 2030 година.

Тоа би претставувало повеќе од 3% од вкупната побарувачка за електрична енергија во Европската Унија, според проценките на Меѓународната агенција за енергија.

Европската комисија оценува дека развојот на дигиталната инфраструктура мора да биде придружен со повисока енергетска и водна ефикасност, употреба на чиста енергија, повторно искористување на отпадната топлина и поголема флексибилност во однос на електроенергетската мрежа.

Tројното зголемување на капацитетот на дата-центрите не смее да значи и тројно поголем притисок врз нашите мрежи, водните ресурси и сметките за енергија. Ефикасни, флексибилни, напојувани со дополнителна чиста енергија и со повторно искористување на отпадната топлина така дата-центрите можат да станат придобивка за енергетската транзиција на ЕУ.

Тереза Рибера, извршна потпретседателка на Европската комисија

Паралелно е отворена и јавна консултација за воведување минимални стандарди за енергетските перформанси на дата-центрите, која ќе трае до 14 декември 2026 година.

Дата-центрите стануваат голем предизвик за енергетските системи

Иницијативата на ЕУ доаѓа во период кога развојот на вештачката интелигенција го забрзува ширењето на енергетски интензивната дигитална инфраструктура. Меѓународната агенција за енергија очекува глобалната потрошувачка на електрична енергија од дата-центрите да се удвои до 2030 година, додека проекти како мегапроектот Pantheon AI во Хрватска укажуваат на обемот на новите капацитети што бараат приклучување на европските мрежи.

Истовремено, технолошките и енергетските компании развиваат решенија што ќе им овозможат на дата-центрите пофлексибилна работа. Google, NVIDIA и Emerald AI неодамна формираа алијанса за флексибилни дата-центри за вештачка интелигенција, кои ќе можат да ја приспособуваат потрошувачката на електрична енергија кон состојбата во мрежата.

Прочитајте повеќе: Вештачката интелигенција ќе ја удвои потрошувачката на електрична енергија од дата-центрите до 2030 година

ECI

Напишете коментар

Вашата адреса за е-пошта нема да биде објавена. Задолжителните полиња се означени со *