Потпишан грант од 2,4 милиони долари за подготовка на когенеративна централа „РЕК Битола 1“

јуни 16, 2026

Потпишан е договор за грант од 2,4 милиони долари за подготовка на проектот за когенеративна централа РЕК Битола 1. Средствата се наменети за подготвителни активности за една од поголемите инвестиции во процесот на модернизација на домашниот енергетски сектор.

Договорот е склучен меѓу АД ЕСМ и Светска банка. Грантот треба да ја поддржи подготовката на проектната документација за идната когенеративна централа во близина на постојниот производствен комплекс на РЕК Битола.

Инвестиција од над 200 милиони евра

Планираната инвестиција е вредна повеќе од 200 милиони евра. Новата когенеративна централа треба да овозможи истовремено производство на електрична и топлинска енергија.

Проектот е дел од поширокиот процес на постепено напуштање на јагленот како основно гориво за производство на електрична енергија на АД ЕСМ. Воедно, тој треба да придонесе за поголемо домашно производство на електрична енергија и за поефикасно користење на постојната енергетска инфраструктура во Битола.

Проширување на топловодната мрежа во Битола

Грантот ги опфаќа и подготвителните активности за проширување на системот за далечинско греење во Битола. Тоа значи дека проектот нема да има само електроенергетска функција, туку и директно значење за снабдувањето со топлинска енергија на Битола.

Со развојот на топловодната мрежа, Битола и околните населени места треба да добијат и пристап до топлинска енергија.

Чекор кон посигурна енергетска иднина

Когенеративната централа РЕК Битола 1 се најавува како проект што треба да помогне во преминот кон почист, посигурен и пофлексибилен енергетски систем.

Проектот има значење и за енергетската сигурност, бидејќи се поврзува со зголемување на домашното производство на електрична енергија. Во исто време, интеграцијата на поефикасни технологии треба да овозможи намалување на јаглеродниот отпечаток, како резултат на намалувањето на производството на електрична енергија од јаглен од постојната термоелектрана РЕК Битола.

Редакција

Напишете коментар

Вашата адреса за е-пошта нема да биде објавена. Задолжителните полиња се означени со *