Финансирањето ќе покрива до 100% од вредноста на проектите, а батериските системи со траење од два до четири часа ќе бидат задолжителни за новите соларни капацитети
Романија започнува две програми со вкупен буџет од 650 милиони евра за поставување фотонапонски системи и батериски складишта за електрична енергија во јавните институции. Средствата се обезбедени преку Фондот за модернизација на Европската Унија.
Според објавата на романскиот премиер Илие Болојан, целта е институциите да произведуваат и складираат електрична енергија за сопствена потрошувачка, да ги намалат сметките и да го ограничат притисокот врз електроенергетската мрежа во периодите на најголема потрошувачка.
500 милиони евра за соларни системи со задолжителни батерии
Првата програма располага со 500 милиони евра и е наменета за изградба на фотонапонски системи со батериски складишта. Складирањето е задолжителен дел од проектите, а батериите треба да бидат димензионирани за траење од два до четири часа.
Во проектите ќе може да се вклучи и поставување топлински пумпи. Произведената електрична енергија ќе биде наменета првенствено за сопствена потрошувачка на јавните институции.
Дополнителни 150 милиони евра за постојните производители
Втората програма, вредна 150 милиони евра, е наменета за јавните институции што веќе располагаат со постројки за производство на електрична енергија од обновливи извори.
Средствата ќе се користат за поставување батериски системи „зад броилото“, со кои произведената енергија ќе може да се складира и да се користи подоцна во рамките на самата институција.
Право на аплицирање ќе имаат општини и окружни совети, јавни болници, државни универзитети, социјални центри и други јавни институции.
До 10 милиони евра по корисник
Финансиската поддршка може да покрие до 100% од прифатливите трошоци на проектот, со максимален износ од 10 милиони евра по корисник.
Повиците се објавуваат на 11 септември 2026 година, а пријавите ќе се поднесуваат до 6 ноември или до исцрпување на расположливиот буџет. Евалуацијата треба да заврши до 12 февруари 2027 година, додека одобрените инвестиции мора да бидат изградени и пуштени во употреба најдоцна до 31 декември 2029 година.
Новите програми го потврдуваат правецот на романската енергетска политика за идното проширување на соларните капацитети да биде поврзано со паралелно инвестирање во складирање. Болојан претходно предложи батериите да станат задолжителни и за идните просумери, оценувајќи дека продолжувањето на соларниот раст без складирање може да создаде дополнителни проблеми за електроенергетскиот систем.
ECI

