Американската компанија EnerVenue ја отвора својата прва фабрика за масовно производство во Хангзоу, Кина, откако претходно се откажа од планот првата производствена локација да ја изгради во Кентаки, САД.
Компанијата развива никел-водородни батерии за стационарно складирање на енергија и планира новата високо автоматизирана фабрика да биде основа за глобално зголемување на производството. EnerVenue официјално потврди дека во Хангзоу ја подготвува својата High Volume Manufacturing Line.
Од планирани $264 милиони во САД до производство во Кина
EnerVenue во 2023 година најави фабрика во Кентаки, САД чија прва фаза требаше да чини 264 милиони долари и да создаде околу 450 работни места. Планот подоцна беше напуштен, а компанијата во меѓувреме ги редизајнирала и батеријата и производствениот процес.
Новата фабрика во Хангзоу е околу 95% автоматизирана и треба да вработува приближно 400 луѓе до крајот на 2026 година.
Инвестицијата во фабриката се проценува на 20 до 50 милиони долари. Извршниот директор Henning Rath за Reuters изјави дека изборот на Кина бил поврзан со концентрацијата на добавувачи, инженерското знаење, високото ниво на автоматизација и пониските трошоци за развој на производната линија.
250 MWh годинава, 1 GWh во 2027 година
Компанијата има цел фабриката да достигне годишен производствен капацитет од 250 MWh во 2026 година, што одговара на околу 300 батериски ќелии дневно.
Следната фаза е значително поголема, при што EnerVenue планира капацитетот да достигне 1 GWh годишно до третиот квартал на 2027 година. Од 2028 година компанијата планира слични производствени капацитети во Северна Америка, Европа и Блискиот Исток, а изборот на локациите треба да започне следната година.
Во март компанијата обезбедила повеќе од 300 милиони долари нов капитал, со инвеститори меѓу кои се Full Vision Capital, Saudi Aramco и SLB.
Никел-водородна технологија наместо класични литиум-јонски батерии
EnerVenue се разликува од голем дел од пазарот за стационарно складирање бидејќи не се потпира на класичната литиум-јонска хемија.
Компанијата развива никел-водородни системи базирани на технологија со корени во вселенските апликации. Основач на компанијата е професорот по материјали од Stanford, Yi Cui, а EnerVenue има истражувачко-развоен центар во Фримонт, Калифорниа.
Преместувањето на првата голема производствена линија од планираната американска локација во Хангзоу истовремено го покажува поширокиот индустриски предизвик во секторот за складирање: развојот на технологијата е само еден дел од конкурентноста, додека достапноста на специјализирани добавувачи, инженери, автоматизација и брзо индустриско скалирање станува подеднакво важна.
ECI

