Проектот ќе комбинира соларна електрана од 180 MW и ветерен парк од 36 MW, со очекувано годишно производство од околу 315 GWh
Полската енергетска групација ORLEN го заврши преземањето на проект за изградба на хибриден комплекс од обновливи извори со вкупна инсталирана моќност од 216 MW. Новиот комплекс ќе комбинира производство на електрична енергија од сонце и ветер и ќе користи заедничка инфраструктура за приклучување кон електроенергетската мрежа.
Проектот „Kazimierz Biskupi“ ќе се реализира во истоимената општина во регионот Голема Полска и ќе опфаќа:
- фотоволтаична електрана со моќност од 180 MW;
- ветерен парк со моќност од 36 MW;
- девет ветерни турбини Vestas V136, секоја со моќност од 4 MW.
Според процените на ORLEN, комплексот ќе произведува околу 315 GWh електрична енергија годишно, што е еквивалентно на потрошувачката на речиси 143.000 домаќинства.
Соларната и ветерната електрана ќе го делат истиот приклучок
Инвестицијата ќе биде реализирана според моделот „cable pooling“, односно соларната и ветерната електрана ќе користат заедничка инфраструктура и расположлив капацитет за приклучување кон мрежата.
Овој модел овозможува поефикасно користење на постојниот мрежен приклучок, бидејќи производството од сонце и ветер има различен дневен и сезонски профил. Комбинирањето на двата извора може да ја намали променливоста на вкупното производство и подобро да го искористи расположливиот мрежен капацитет.
Проектот беше преземен преку ORLEN New Power, компанија во рамките на групацијата задолжена за развој и управување со копнените капацитети од обновливи извори. Од полските инвеститори ONDE и Neo Energy Group се купени две проектни компании што ги поседуваат правата за изградба на соларната и ветерната електрана.
ONDE ќе биде главен изведувач, Neo Energy Group ќе управува со процесот на изградба, додека инвестицискиот надзор во име на ORLEN ќе го спроведува Energa Green Development.
Комерцијално производство во 2028 година
Почетокот на градежните работи е планиран за третиот квартал од 2026 година. Првото пуштање под напон и поврзувањето со мрежата се очекуваат на почетокот од 2028 година, додека целосното комерцијално работење е предвидено за вториот квартал од истата година.
Во близина веќе се наоѓа хибридниот комплекс Kleczew Solar & Wind. Двата проекта се оддалечени околу осум километри, а нивната заедничка моќност ќе достигне 485 MW. Со тоа, во регионот ќе биде формиран еден од поголемите копнени кластери на обновлива енергија во Полска.
Концентрацијата на соларни и ветерни капацитети на иста локација, според ORLEN, треба да овозможи и оперативни придобивки преку заедничко управување, пониски трошоци за одржување и поефикасно користење на мрежната инфраструктура.
ECI

