Greenvolt Power и Statkraft склучија 10-годишен договор за управување и пазарна оптимизација на два големи батериски системи за складирање енергија во Полска, со вкупна моќност од 400 MW и капацитет од 1,6 GWh.
Договорот ги опфаќа батериските системи Ełk и Turośń Kościelna, секој со моќност од 200 MW и капацитет за складирање од 800 MWh. Станува збор за два од најголемите BESS проекти во Полска и меѓу поголемите батериски системи во Европската Унија.
Според договорот, Statkraft ќе ја оптимизира и тргува флексибилноста што ја обезбедуваат двата батериски системи на пазарите на електрична енергија. За Greenvolt Power, договорот обезбедува дополнителен долгорочен и предвидлив извор на приходи, покрај приходите што проектите веќе ги имаат обезбедено преку полскиот пазар на капацитет.
Четиричасовни батерии од 200 MW
Двата проекта имаат идентични основни параметри – 200 MW моќност и 800 MWh капацитет, што овозможува приближно четири часа испорака на електрична енергија при максимална моќност.
Turośń Kościelna веќе беше официјално пуштен во употреба во јули 2026 година. Системот е приклучен на полската преносна мрежа на 110 kV и користи LFP батериска технологија.
Од 2028 година, Turośń Kościelna ќе учествува и на полскиот пазар на капацитет врз основа на 17-годишен договор, со обврска за обезбедување 170 MW.
Проектот Ełk, исто така со 200 MW / 800 MWh, е во завршна фаза, а комерцијалното работење е планирано во четвртиот квартал од 2026 година.
Со двата системи, Greenvolt Power ќе располага со 400 MW батериска моќност и 1,6 GWh капацитет за складирање во североисточна Полска.
Statkraft ќе ја претвора флексибилноста во пазарни приходи
Клучниот елемент на новиот договор е моделот на соработка меѓу сопственикот на батериите и компанијата што ја презема нивната пазарна оптимизација.
Statkraft ќе одлучува како флексибилноста на двата системи да се користи на различните сегменти на пазарот на електрична енергија. Батериите можат да се полнат кога електричната енергија е поевтина или кога во системот има поголемо производство, а да испорачуваат енергија во периоди на повисока побарувачка и цени.
Дополнително, брзата реакција на BESS овозможува нивно користење за балансирање и системски услуги.
За Greenvolt Power, 10-годишниот tolling договор додава уште еден приходен механизам покрај полскиот пазар на капацитет. Тоа е особено значајно за големите батериски проекти, бидејќи комбинирањето на повеќе извори на приходи ја намалува изложеноста на краткорочните движења на пазарните цени и ја подобрува финансиската предвидливост на инвестицијата.
€218 милиони финансиски пакет за двата проекта
Greenvolt претходно обезбеди и значително финансирање за Ełk и Turośń Kościelna.
Во август 2026 година, групацијата објави договор со UniCredit за финансиски пакет од вкупно €218 милиони. Тој вклучува €153 милиони bridge facilities и дополнителна гаранциска линија од €65 милиони.
Greenvolt оцени дека договорот покажува дека големите батериски системи сè повеќе се третираат како зрела инфраструктурна класа на средства што може да привлече банкарско финансирање.
Со Ełk, Turośń Kościelna и Siedlce, трите проекти заедно ќе достигнат 1 GW моќност и 4 GWh капацитет за складирање, дополнително зголемувајќи ја улогата на батериските системи во полскиот електроенергетски систем.
Развојот е особено значаен во услови на растечко производство од ветерни и фотонапонски електрани. Батериските системи овозможуваат дел од производството да се помести од периодите со висока понуда кон часовите со поголема побарувачка, а истовремено обезбедуваат брза флексибилност за електроенергетската мрежа.
ECI

