Албанија подготвува нов закон за енергетика според стандардите на ЕУ

јуни 5, 2026

Албанија подготвува нов закон за енергетика, со кој земјата треба да се приближи до правната рамка на Европската Унија и да ја модернизира регулацијата на пазарот на електрична енергија.

Министерот за инфраструктура и енергетика, Енеа Каракачи, соопшти дека владата го одобрила нацрт-законот за регулирање на секторот за еелектрична енергија и пазарот за електрична енергија, кој наскоро треба да биде доставен и усвоен во парламентот. Според него, вакви реформи во енергетиката се случуваат еднаш на 10 до 15 години, а претходниот закон од 2015 година ја трансформирал енергетиката во Албанија и одговорил на тогашните предизвици.

Новиот закон треба да ја внесе Албанија во нова фаза на развој на електроенергетскиот сектор. Во него се предвидуваат нови дефиниции и механизми кои не биле опфатени со претходната законска рамка, меѓу кои се складирањето на електрична енергија, нови форми на агрегирање и правила за активните потрошувачи.

Фотонапонската енергија веќе има значајна улога

Министерот Каракачи посочи дека Албанија повеќе не е земја која се потпира само на хидроенергетски извори. Според него, земјата веќе се наоѓа во поинаква фаза, во која фотонапонската енергија надминала 10 проценти од домашното производство на електрична енергија.

Овој податок е важен бидејќи покажува дека албанскиот електроенергетски систем постепено се менува од систем доминантно зависен од хидроенергија кон поразновидна структура, во која сè поголема улога имаат фотонапонските електрани, инвестициите на слободен пазар и проектите поддржани преку аукции.

Складирање, агрегирање и самопотрошувачи

Еден од најважните елементи на новиот закон е воведувањето на правила за складирање на електрична енергија. Тоа е значаен чекор за пазарите во регионот, бидејќи батериските системи стануваат клучна технологија за балансирање на производството од обновливи извори, намалување на нестабилноста и подобро управување со мрежата.

Дополнително, законот треба да овозможи и нови форми на агрегирање, што може да биде важно за домаќинствата, компаниите и самопотрошувачите. Со вакви механизми, повеќе мали производители или потрошувачи можат заеднички да настапуваат на пазарот, да ја оптимизираат потрошувачката и да придонесат за поголема флексибилност на електроенергетскиот систем.

Европска интеграција и финансиска поддршка

Вториот важен аспект на нацрт-законот е европската интеграција. Според министерот Каракачи, законот е обврска на Албанија во рамки на процесот на приближување кон Европската Унија, но и дел од обврските поврзани со Планот за раст. Со неговото усвојување, Албанија треба да добие и финансиска помош од Европската Унија.

Ова ја прави реформата значајна не само од енергетски, туку и од економски и институционален аспект. Усогласувањето со европските правила треба да создаде подобри услови за инвестиции, поголема предвидливост за инвеститорите и посовремен пазарен модел.

Редакција

Напишете коментар

Вашата адреса за е-пошта нема да биде објавена. Задолжителните полиња се означени со *