Verbund ќе гради ветерен парк од 72,6 MW во Албанија

ноември 2, 2026

Австриската енергетска компанија Verbung и албанското Министерство за инфраструктура и енергетика го потпишаа конечниот договор за изградба на ветерниот парк Спиле, со инсталирана моќност од 72,6 MW. Проектот, кој ќе се реализира во општината Рогожина, во близина на јадранскиот брег, претставува значаен чекор во развојот на ветерната енергија во Албанија.

Договорот беше потпишан на 29 октомври 2026 година, а според албанските власти, инвеститорот ги обезбедил потребните дозволи и ги исполнил условите за започнување на градежните активности. Истовремено е потпишан и договорот за откуп на произведената електрична енергија.

Комерцијалното производство се очекува да започне во првиот квартал на 2028 година.

Спиле е првиот проект избран на националната аукција за ветерни електрани кој ги исполнил сите предуслови за преминување во фазата на изградба. Неговата реализација треба да го означи почетокот на комерцијалното искористување на ветерната енергија во земја чиј електроенергетски систем традиционално се потпира на хидроелектраните.

Дванаесет ветерни турбини и 130 GWh годишно производство

Според официјалната проектна документација на Verbund, ветерниот парк Спиле е проектиран со 12 ветерни турбини, со вкупна планирана моќност од околу 75 MW.

Договорената моќност од аукцијата изнесува 72,6 MW, додека компанијата во техничкиот опис го наведува заокружениот проектен капацитет од 75 MW.

Очекуваното годишно производство изнесува приближно 130 GWh електрична енергија.

Проектот ќе се реализира на ридски терен во близина на крајбрежното населено место Спиле, на околу 6,5 километри од Јадранското Море. Локацијата е избрана поради расположливиот ветерен потенцијал и близината до постојната преносна инфраструктура.

Во рамките на инвестицијата е предвидена изградба на нова трафостаница 30/110 kV и двосистемски надземен далекувод со должина од 5,7 километри, преку кој електраната ќе се поврзе со националната електроенергетска мрежа.

За изградбата, работењето и одржувањето на електраната е формирано посебно проектно друштво, Verbund Green Power Albania Wind Shpk.

Од првата ветерна аукција до проект подготвен за изградба

Развојот на Спиле е поврзан со првата конкурентна аукција за ветерни електрани во Албанија.

Аукцијата беше најавена во 2021 година, а во јули 2023 година Verbund доби право да развива ветерен проект со моќност од 72,6 MW.

Министерот за инфраструктура и енергетика на Албанија, Enea Karakaçi, нагласи дека проектот ги исполнил сите потребни предуслови, вклучувајќи ја градежната дозвола и договорот за откуп на електрична енергија.

Според него, од трите ветерни проекти избрани на првата национална аукција, Спиле е првиот што достигнал фаза на непосредна реализација.

Министерството очекува изградбата да придонесе и за локалната економија преку подобрување на пристапната инфраструктура и ангажирање албански компании и подизведувачи.

VERBUND веќе има присуство во албанскиот енергетски сектор преку хидроенергетскиот проект Ашта, а новата инвестиција го проширува неговото портфолио кон ветерната енергија.

Ветерната енергија треба да ја намали зависноста од хидролошките услови

Албанија е една од европските земји со најголема зависност од хидроенергијата во домашното производство на електрична енергија.

Иако таквата структура овозможува производство со ниски директни емисии на јаглерод диоксид, истовремено го прави електроенергетскиот систем чувствителен на суши, сезонски промени во водостоите и неповолни хидролошки години.

Во такви услови, развојот на ветерните и сончевите електрани претставува важен инструмент за диверзификација на производството и намалување на изложеноста на хидролошките ризици.

Албанското Министерство за инфраструктура и енергетика го посочува токму овој аспект како една од главните причини за развојот на новите ветерни капацитети.

Целта не е само зголемување на инсталираната моќност, туку создавање поразновидна производна структура во која хидроенергијата, сончевата енергија и ветерот меѓусебно ќе се надополнуваат.

Планираното годишно производство на Спиле од околу 130 GWh ќе претставува дополнителен домашен извор на електрична енергија, со потенцијал да ја намали потребата од увоз во периоди кога производството од хидроелектраните е ограничено.

ECI

Напишете коментар

Вашата адреса за е-пошта нема да биде објавена. Задолжителните полиња се означени со *