Викторија воведе три часа бесплатна електрична енергија дневно

октомври 2, 2026

Австралиската држава Викторија од 1 октомври 2026 година воведе нов модел на тарифа со кој домаќинствата можат да користат електрична енергија без надомест три часа секој ден, во периодот од 11:00 до 14:00 часот.

Програмата Victorian Midday Power Saver е дизајнирана да ја префрли потрошувачката во периодот кога производството од соларните електрани е високо, а притисокот врз електроенергетската мрежа е помал. Владата на Викторија очекува мерката истовремено да им помогне на домаќинствата да ги намалат сметките и да ја намали побарувачката во утринските и вечерните врвни часови.

Бесплатна електрична енергија од 11 до 14 часот

Midday Power Saver е доброволна тарифа. Домаќинствата не се префрлаат автоматски, туку треба да ја изберат понудата преку својот снабдувач.

Во бесплатниот период цената на потрошената електрична енергија е 0 $/kWh, додека надвор од него важат различни тарифи. Официјалниот тарифник на Essential Services Commission покажува дека програмата е предвидена да важи од 1 октомври 2026 до 30 јуни 2027 година.

Моделот создава директен економски поттик домаќинствата да го менуваат времето на потрошувачката. Машини за перење и садови, електрични бојлери, климатизација и други уреди може да се активираат во средината на денот, а електричните возила и домашните батерии да се полнат токму во бесплатниот период.

За користење на тарифата е потребно домаќинството да има паметно броило.

Од проблем со соларниот вишок до ресурс за потрошувачите

Мерката покажува како брзиот раст на соларното производство почнува да ја менува традиционалната логика на тарифирањето на електричната енергија.

Наместо системот само да реагира на големото производство во часовите околу пладне, потрошувачите добиваат финансиски поттик да ја преместат побарувачката токму во тие часови.

Тоа може да помогне дел од дневната потрошувачка да се помести од вечерниот врв, кога соларното производство опаѓа, а потребата од електрична енергија останува висока.

Владата проценува дека домаќинствата кои ќе префрлат меѓу 5% и 30% од потрошувачката во бесплатниот период можат да заштедат приближно 149–428 австралиски долари, зависно од нивниот профил на потрошувачка. За домаќинство со електрично возило потенцијалната вкупна годишна заштеда може да достигне околу 1.102 австралиски долари доколку возилото се полни во бесплатниот период наместо во часовите со висока тарифа.

Сепак, програмата не значи автоматски пониска сметка за секое домаќинство. Официјалните информации предупредуваат дека цените надвор од бесплатниот период и фиксните дневни трошоци може да бидат повисоки, поради што економската корист зависи од тоа колкав дел од потрошувачката реално може да се премести меѓу 11 и 14 часот.

Нов модел за електроенергетски систем со многу ОИЕ

Midday Power Saver е пример за пошироката трансформација на електроенергетските системи со висок удел на обновливи извори.

Со растот на фотонапонските електрани, вредноста на електричната енергија сè повеќе зависи не само од тоа колку енергија се произведува, туку и кога се произведува и кога се троши.

Затоа управувањето со побарувачката, батериското складирање, паметното полнење на електричните возила и динамичните тарифи стануваат важен дел од интеграцијата на обновливите извори.

Во случајот на Викторија, ценовниот сигнал е максимално едноставен: три часа во кои потрошувачот не плаќа за потрошената електрична енергија.

ECI

Напишете коментар

Вашата адреса за е-пошта нема да биде објавена. Задолжителните полиња се означени со *