EDF ќе изгради 400 MW соларна електрана со батерија од 1.600 MWh

август 25, 2026

EDF power solutions развива голем соларно-батериски комплекс во американската сојузна држава Невада, кој ќе обедини соларна електрана од 400 MW и батериски систем со капацитет од 1.600 MWh.

Компанијата потпиша два 25-годишни договори со NV Energy за откуп на целокупната електрична енергија од проектот Winston Energy. Почетокот на испораката е планиран за октомври 2029 година.

Батеријата ќе складира четиричасовно производство

Соларната електрана ќе има инсталирана моќност од 400 MWac, додека батерискиот систем ќе располага со моќност од 400 MW и капацитет од 1.600 MWh.

Оваа конфигурација ќе овозможи батеријата да испорачува електрична енергија со максимална моќност во текот на четири часа. Дел од производството во сончевите периоди ќе може да се складира и да се испорача во мрежата подоцна, кога побарувачката е повисока.

Winston Energy ќе биде изграден на приватно земјиште во округот Лајон во Невада. Според планот на EDF, комплексот треба да почне со комерцијална испорака на електрична енергија во октомври 2029 година.

Годишно производство од 1,11 милиони MWh

Проектот се очекува да произведува приближно 1,11 милиони MWh обновлива електрична енергија годишно. Според проценката на компанијата, тоа е доволно за снабдување на околу 100.000 домаќинства во Невада.

EDF наведува дека годишното производство ќе овозможи избегнување емисии на јаглерод диоксид еквивалентни на емисиите што ги создаваат повеќе од 187.000 патнички автомобили во текот на една година.

Проценката е направена врз основа на методологијата на американската Агенција за заштита на животната средина и вообичаените претпоставки за загубите при преносот на електрична енергија.

Околу 100 милиони долари за локалната заедница

Во периодот на најинтензивни градежни активности се очекува проектот да ангажира повеќе од 400 работници.

Во текот на работниот век на комплексот, Winston Energy треба да генерира и приближно 100 милиони долари даночни приходи за локалната заедница.

EDF power solutions North America развива, гради и управува со нискојаглеродни енергетски проекти во САД, Канада и Мексико. Компанијата соопшти дека досега има развиено 26 GW ветерни, соларни и капацитети за складирање електрична енергија во Северна Америка.

ECI

Напишете коментар

Вашата адреса за е-пошта нема да биде објавена. Задолжителните полиња се означени со *