Новите нуклеарни електрани остануваат најскапи, ветерот и соларот најконкурентни

јули 15, 2026

Lazard 2026: Копнените ветерни и големите соларни електрани и понатаму имаат најнизок нивелиран трошок на производство, додека новите нуклеарни капацитети остануваат убедливо најскапата технологија за изградба во САД.

Обновливите извори на енергија и во 2026 година остануваат најконкурентната опција за изградба на нови производствени капацитети, покажува најновата анализа Levelized Cost of Energy+ Version 19.0, објавена од Lazard.

Иако сите технологии се соочуваат со повисоки капитални трошоци, инфлација и растечки каматни стапки, копнените ветерни и големите соларни електрани сè уште имаат најнизок нивелиран трошок на производство (LCOE), додека новите нуклеарни електрани остануваат најскапата инвестиција.

Анализата е базирана на американскиот пазар и користи претпоставки за трошоци, финансирање и даночна политика во САД, но извештајот се смета за една од најреферентните глобални споредби на економската конкурентност на различните технологии.

Ветерот и соларот остануваат најевтините нови извори на електрична енергија

Според анализата, копнените ветерни електрани имаат LCOE од 37 до 99 долари за MWh, додека кај големите соларни електрани нивелираниот трошок се движи од 40 до 98 долари за MWh.

Во овогодинешното издание за првпат е вклучена и геотермалната енергија, со проценет LCOE од 67 до 111 долари за MWh, со што Lazard ја препознава како сè позначајна нискојаглеродна технологија за континуирано производство на електрична енергија.

Гасните комбинирани циклуси остануваат најконкурентниот диспeчерски извор

Кај конвенционалните технологии, најниски трошоци имаат гасните комбинирани циклуси (CCGT), чиј LCOE се движи помеѓу 51 и 129 долари за MWh.

Сепак, Lazard предупредува дека ограничената понуда на гасни турбини, повисоките капитални трошоци и продолжените рокови за испорака ја зголемуваат цената на новите гасни електрани. Централите за покривање на врвната побарувачка (Gas Peaking) имаат значително повисок LCOE, од 144 до 276 долари за MWh.

Новите нуклеарни електрани остануваат најскапата технологија

Највисоки инвестициски трошоци и понатаму имаат новите нуклеарни електрани.

Според Lazard, нивелираниот трошок на производство кај новите нуклеарни проекти достигнува 175–255 долари за MWh, што е повеќекратно повисоко во споредба со ветерните и соларните електрани.

Проценката е базирана на најновите достапни информации од американскиот проект Vogtle Units 3 и 4, кој претставува најрелевантниот пример за новоизградена нуклеарна централа во САД.

Цената на капиталот станува сè поважен фактор

Lazard наведува дека една од најголемите промени во 2026 година е влијанието на цената на капиталот (WACC) врз економската исплатливост на новите инвестиции.

Повисоките каматни стапки имаат особено силно влијание врз капитално интензивните технологии, како нуклеарните електрани и офшор ветерните паркови, додека и соларните и ветерните проекти бележат повисок LCOE во споредба со претходните години.

Постојните електрани добиваат поголема економска вредност

Извештајот покажува дека растот на трошоците за нови електрани ја зголемува економската вредност на веќе изградените производствени капацитети.

Маргиналните оперативни трошоци на постојните нуклеарни електрани се движат од 26 до 36 долари за MWh, кај постојните гасни комбинирани циклуси од 32 до 51 долари за MWh, а кај јаглените електрани од 34 до 69 долари за MWh. Според Lazard, токму ова ја објаснува сè поголемата заинтересираност за продолжување на работниот век и рестартирање на постојните нуклеарни капацитети.

ECI

Напишете коментар

Вашата адреса за е-пошта нема да биде објавена. Задолжителните полиња се означени со *